Dirección artística e presentación dos III Premios Martín Códax da Música

Se estás lendo isto, ímosche propoñer un xogo. Nomea tres artistas da música galega racializadas, ben sexan negras, árabes ou asiáticas. Se non che sae, proba a nomear entón tres músicas galegas con discapacidade. Difícil, non? A nosoutras pasounos o mesmo e por iso percibimos a urxencia de poñer no centro do escenario as anormais, as monstruosas, as diferentes que habitan nas marxes do sistema musical galego.

Penduramos unhas luciñas de verbena para recibir no torreiro do Pazo da Cultura de Pontevedra músicas e músicos que tocan na rúa, noveis, con diversidade funcional, racializadas, do colectivo LGBTIQ+ e vellas que nos lembraban que temos que poñer o foco na diversidade se queremos unha música galega gorentosa. Así as finalistas, ganadoras e público puideron gozar das actuacións de Paco Barreiro, Batuko Tabanka, Desirée Gómez, Xerock e Antía Figueroa.

Se vos presta, podedes ver aquí un dos nosos números máis provocadores da gala, no que os peringallos das nosas cricas cobraban vida e bailaban con nós a coreografía dos Premios Martín Conas.