Campañas 8M

Dentro das nosas “improdutividades” (accións artísticas que aproveitan a nosa visibilidade para xerar un impacto social sen perseguir necesariamente un beneficio económico) desenvolvemos tres proxectos de sensibilización sobre a igualdade de oportunidades entre mulleres e homes. Eu con este rolete bateríalle, Estou até os miolos e Día da muller rebordan a estrutura estable de A Panadaría ábrenlles as portas a teatreiras, docentes e mesmo a unha panadeira para que denuncien a violencia machista, as invisibilizacións e as desigualdades. Para que reivindiquen máis dereitos e máis referentes de mulleres apoderadas e outras identidades sexuais e de xénero.

Eu con este rolete bateríalle (2015)
En 1969 a artista Valie Export presenta a súa performance Action Pants: Genital panic na que irrompeu nun cine de Múnic cunha metralleta nas mans e os vaqueiros rachados á altura da vulva. En 2015 Marina Abramovic, admirada polo poder da acción de Valie, encarnou a mesma performance en Nova York. Nós, fascinadas tamén pola obra da artista austríaca, creamos a serie fotográfica Eu con este rolete bateríalle na que o rolete de madeira substitúe a metralleta e as nosas convidadas expoñen coa súa carraxe fronte a desigualdade.

Estou até os miolos (2016)
Na nosa profesión as mulleres somos minoría en case todas as áreas. Convidamos unha directora, unha figurinista, unha dramaturga e unha distribuidora e produtora a contarnos de que están fartas ou, falando doutro xeito, de que están até os miolos.

Día da muller (2017)
Tradicionalmente a panadaría foi, na nosa terra, un oficio de mulleres e, tal e como aconteceu nos últimos tempos no ámbito da cociña, co aumento de prestixio desta profesión as figuras que acadaron visibilidade e boa posición económica foron os homes. Presentámosvos nesta peza audiovisual a Carla Ribadulla, prata no Campionato Galego de Panadería 2016. As mulleres queremos as mesmas oportunidades, estamos fartas de ser personaxes secundarias.