Colaboración con Artesa Cía para “Chola, a it girl”

“A muller pura vai ao ceo celestial. Aiiii, pero a muller impura vai cunha satisfacción descomunal!”.
A Panadaría colabora neste espectáculo, Chola, a it girl, de Artesa Cía., creado por Laura Villaverde como un proxecto transmedia que inclúe, alén do espectáculo, unha webserie, un blog e unha tenda en liña. Na montaxe podemos ver sobre o escenario a Chola, personaxe interpretado por Villaverde, conducindo e gabeando por riba dun Opel Calibra vermello nun show enerxético e desenfadado.

Cuestionar os canons de beleza e reivindicar a resistencia das mulleres do rural confórmase como obxectivo principal deste espectáculo no que todo un reparto de actrices e actores, entre os que nos atopamos Areta Bolado, Noelia Castro e Ailén Kendelman, interactuamos coa protagonista a través de proxeccións audiovisuais.