Manual do Macho Ibérico

Á chamada da coordinadora da Sección de Pensamento do Consello da Cultura Galega, Carme Adán, realizamos esta encarga de idear e gravar unha peza audiovisual inspirada no espectáculo Elisa e Marcela. Interesadas polas posibilidades formais e estéticas do videoclip, creamos esta reflexión desenfadada sobre a construción da masculinidade hexemónica tradicional.

Desde A Panadaría subliñamos a importancia de reescribir as poéticas hexemónicas desde posicións disidentes e, coma nesta peza, revelar que elementos da masculinidade están en cuestión e como se poden reverter modelos, posturas, roles e estereotipos á procura de masculinidades igualitarias.
A videocreación musical está inspirada nos obradoiros Man for a day de Diane Torr e a creación artística de Cabello-Carceller, recolle a nosa admiración pola escena drag king galega e homenaxea todas as mulleres que, como Elisa, empregaron o travestismo funcional para desafiar as normas que lles impedían acceder a espazos reservados aos homes cisxénero.

Este videoclip proxectouse por primeira vez nas xornadas Pensar con Orgullo no Pazo de Raxoi en Santiago de Compostela en xuño de 2019.